Mampui,Mitthli le khawm fie zo lo hi, thumal rem khawm hin a dawn phak ding am maw?Vawisun hi, nang le ei 'vawisun' tawpna a nih ti ka hriet. A nina anga thil pawm hlak dinga zirtirtu che hin hi 'thil' hi a nina anga pawm intak ka tih. Nang le kei hin danglamna tlung dang ding hin hrâtna ei nei si nawh. Leilung dana thil pangngai hi a danglam meu si a !Ka lung asie a, ka țap a. Ka lungngai a, kan rûm a. Thil tam tak ka ngaituo a - ka hriet seng nawh. Hma hun sei tak thlir ka tum a, dàwn a tawi thur el. Ka bo map a, ka hip chur a...tû tak hin chu lâktlak kan ta nawh.Thina - hi thumal țibaium nina indik tak fie dinga i țuon a țha talu hi ka thik țep țep che. Iem a ni chi hrie dinga huoisenna ka nei ngailo ana , tu khawm hin ka la nei țhak nawh. Nang chun i hriet tah a. Thei ni sien mi hang hril la, ti raw?Zinga zing ni suok chu kei chau in hmasuon tang ka ta. Sie thei lo dinga ei indin lungril biekbûka hmangaina maicham ah khan, makhât in inhlân tâng ka a. I zing chibai bukna dawng loa ni kan thla ding chu ka thlakhla hran naw ie I ditsakna țhang loa tlaithlêng hang kil ka ta. Chu chun a tawp el naw ding si . Iengkim el chu 'i țhang loin' a ni vawng ta ding. Mampui, i fena dinga i mikhuol nêk hmanin hi khawvel ah hin ka mikhuol lem ka ring a nih.I maw, tlai ni thla ding kawla chun nang ka hriet zingna hi fe liempui dingin ngen ngai nawng ka ta; khawvar ding kawla ka ta din ni thar lo her suokpui dingin duhthu sâm ngai nawng ka tih. I țhangve lona khawvela tleipui ding nunhlui i mi hnutsie hi ka damsung a din a hun e.Beiseina mei sem chawk dinga ka thing nawi ruot hai chu chawk nuom sienkhawm, pâr suo khawpin a a chawk naw ding - ka hriet, nisienkhawm....Khawsawtna dai fiem ah chun nghak suok ding um lo chu nghak ka ta. Thim hmul le varțien ha'n ang khata am mi biekna chu dawn dingin um nawng ka tih. I ruola an phum bo tah ka nun hlimna cho suok dinga i thlan vûng cho dar ding hin hratna ka nei phal ngai naw ding si.Thina leia mi dam in thina leh hringna inkara leilâk daw dinga a damsung nun a hmang chu thlirin tlâng ha'n to inchu an ta; vate hai khawma ri reng reng siem nawng an ta; vadunga tui hai khawmin ngui ngie in luong tang an tih. Zing ni suok hlim lo hmel chu tlai ni tlak chen in danglam nawng a ta; arasi hai zie ruok chu danglam a tih. Ei lawm hlak thla in biel suok khin ka malna khawvel min țawmpui lo ti hrietna chun a mi thlamuong zo awm si naw....khaw lam i um?!Nun phek tam ziek dinga ei hun hmang kawp kha a sawt nawna tieng chau a nih...ti raw? Ei chanchin kha keiin hang ziek zawm ka ta, tuorna chau tiem ding um tang a ta. I țhang lo chun ka ziek ngainuom zo naw ding. A mak naw e.Mampui, lunglengna tlang thienghlima mi țap puitu khawsawtna hi i thlarau a ni hiel am? Kei ah nang kha a thi ve naw a, nang ah kei hlak chu a ni telin a hmawn tiel tiel ding a nih hi.Khawvel khêl tienga i hlimna dinga ditsakna thu, thikna țhang loa kan hlân thei naw che hi mi dem naw aw...hiengti taka na hin i mi siem ka lo ring phak ngai naw a nih!(Ka ruolpa, a nuhmei in a maksan ta hnung ta dinga ka dedicate a nih.)
LEKHA NUHNUNG
To be informed of the latest articles, subscribe:
Comment on this post
F
J
F